Sonia Méndez ultima na Fonsagrada a filmación da película 'As Neves'

A directora e guionista viguesa Sonia Méndez encara estes días a recta final do proceso de filmación do primeira longametraxe, As Neves, no municipio lucense da A Fonsagrada que comezou a mediados de decembro cun equipo formado por máis de 60 persoas.

A maior parte das localizacións deste drama psicolóxico, protagonizado por un grupo de adolescentes que se enfrontan á desaparición dunha das súas amigas durante a celebración do Entroido nunha comunidade remota do interior de Galicia, están na provincia de Lugo.

As Neves, de Cósmica Produccións, con Aquí e Alí Films na coprodución, é a primeira experiencia de Sonia Méndez como directora e guionista dunha longametraxe de ficción, aínda que a autora conta cunha recoñecida traxectoria de máis de 20 anos no sector audiovisual. De feito, gañou os premios Mestre Mateo á mellor curtametraxe nos anos 2011 e 2012, por As damas negras e Conversación cunha muller morta. Tamén é a directora do festival de contidos dixitais Carballo Interplay.

Este proxecto conta co apoio da Xunta de Galicia e, de feito, a produtora contou cunha subvención na fase de desenvolvemento do mesmo de 260.000 euros, a través da convocatoria de 2021 para producións e coproducións audiovisuais.

O conselleiro de Cultura, Educación, FP e Universidades, Román Rodríguez, asistiu este luns na Fonsagrada a unha das sesións de rodaxe, acompañado polo director da Axencia Galega das Industrias Culturais, Jacobo Sutil, e o delegado territorial da Xunta de Galicia en Lugo.

Unha parte da xornada de traballo consistiu na rodaxe de varias secuencias na casa familiar de Erea, unha das protagonistas da película, interpretada por Andrea Fernández, e do sarxento Portas, a súa nai, á que lle dá vida Lucía Veiga.

Durante a visita, o responsable autonómica de Cultura mostrouse convencido de que 2023 volverá ser un "bo ano para o audiovisual galego", porque películas como a que estes días está a ser rodada na Fonsagrada contribuirán ao éxito do sector. "Desde a Xunta cremos que este é un sector estratéxico, cunha gran capacidade para crear emprego e, como ocorre neste caso, pór en valor espazos rurais de Galicia e divulgar o bo traballo que están a facer os nosos profesionais", engadiu.