Fontes dos servizos de urxencias que participaron no operativo de procura dun home desaparecido no bosque da Marronda, no municipio lucense de Baleira, lamentaron que este individuo "xogase ao agocho" durante toda a fin de semana.
Segundo sinalaron en declaracións a Efe, o home, que vive nunha parroquia do concello veciño de Ribeira de Piquín, foi visto ao mediodía do luns na súa casa "porque se achegou a comer", momento o o que se decidiu suspender o operativo.
A procura iniciouse o venres a última hora da tarde, cando o home, que está a tratamento psiquiátrico, saltou voluntariamente dun coche en marcha e penetrouse na zona boscosa da Marronda.
"Estaba escondido nunha zona na que el podía vernos pero nós a el non; algo así como os cristais tintados dun coche"
Durante toda a fin de semana e tamén na mañá do luns participaron nas labores de rastrexo membros de Protección Civil da Fonsagrada e Ribeira de Piquín, axentes da Garda Civil con cans especializados, varios expertos en rutas de sendeirismo e medio centenar de veciños da comarca.
Finalmente, este luns ao mediodía, o home tivo a "picardía" de achegarse á súa casa cando o operativo da mañá finalizara, "pero foi visto", segundo apuntaron desde os servizos de urxencias.
"Dános rabia porque está a burlarse de ti, estaba a xogar ao agocho", lamentaron as mesmas fontes.
"Estaba escondido no medio dun bosque total e absoluto, no que el pode vernos pero nós a el non; é algo así como os cristais tintados dun coche", advertiron.
"Andivo todo o tempo xogando, ata que pesou máis a fame", sinalaron desde os servizos de urxencias.
