A Deputación Provincial avanza no seu compromiso de lograr que a residencia de maiores de Pedrafita empece a recibir os seus primeiros usuarios esta mesma primavera. Con este obxectivo, a institución provincial acaba de finalizar a instalación dos diversos equipamentos, unha partida á que destinou un orzamento de 275.000 euros.
As empresas subministradoras deste mobiliario finalizaron estes días o acondicionamento das zonas comúns, as habitacións, cociña, lavandería e oficinas. Así, instaláronse butacas, andeis e mesas. Ademais, equipáronse uns espazos que estarán dedicados á lectura e amoblouse a sala de televisión, que servirá tamén como punto de reunión.
Tamén se instalou todo o mobiliario das habitacións, coas súas correspondentes camas, colchóns e mesas auxiliares. Pola súa banda, os espazos dedicados a lavandería e cociña dotáronse de maquinaria industrial e fogóns, co fin de que xa estean operativos ao 100% cando empecen a chegar ao centro os primeiros residentes.
A entidade provincial mantén aberta a fase para a contratación dos servizos de cociña, limpeza e asistencia básica
O Centro de Atención a Maiores (CAM) de Pedrafita está habilitado para atender un total de 30 prazas de residencia e 20 de centro de día. Do mesmo xeito que nos demais centros de maiores da rede provincial, os veciños da localidade son os que terán prioridade á hora de cubrir as prazas dispoñibles, estando os restantes a disposición dos demais municipios da comarca e lucenses en xeral.
O custo de cada praza adaptarase á capacidade económica de cada usuario, co obxectivo de que todas as persoas que o desexen poidan ter acceso a este servizo.
PRESTACIóNS BÁSICAS. A Deputación tamén ten aberto o procedemento para a contratación das prestacións básicas, o que constitúe o último paso administrativo para poder poñer en marcha o centro. Este contrato inclúe as prestacións de cociña, limpeza e asistencia básica, cun importe de licitación de 771.871 euros, ata xuño de 2022.
O Centro de Atención a Maiores de Pedrafita está situado no centro urbano, xusto á beira da casa consistorial. O edificio conta cunha superficie de 1.731 metros cadrados que se distribúen en tres plantas. Cando abra as súas portas será a sexta residencia de maiores da rede provincial que estea operativa, xunto ás de Trabada, Ribadeo, Pol, A Fonsagrada e Castroverde.
