As fortes choivas dos últimos meses provocaron importantes danos no muro dunha vivenda do castro de Castañoso, na Fonsagrada. O equipo de arqueólogos de Terra Arqueos, que xa traballara alí con anterioridade, ocupouse de restaurar a parede deteriorada.
Luís Francisco López, director da escavación levada a cabo no Castelón —así se coñece o castro— , explicou que se trata dunha "incidencia causada polo clima" e descarta que se deba a algún erro nas tarefas arqueolóxicas. "É un muro de máis de 2.000 anos que pode que tivera algún fallo estrutural de construción, e é normal que se vexa afectado pola choiva despois de tanto tempo", engadiu. López destaca que levaron a cabo as actuacións de restauración e aproveitaron para limpar un pouco a zona.
O edificio termal do castro, unha sauna do século I d.C. descuberta recentemente, non sufriu dano algún. "É a sauna castrexa mellor conservada do noroeste peninsular", indicou o arqueólogo.
ANTIGÜIDADE. O castro de O Castelón, na parroquia fonsagradina de O Castañoso, ten máis de 2.000 anos de historia. É probable que estivese poboado antes, pero as escavacións acometidas non foron o suficientemente profundas para comprobalo.
Construído nun terreo elevado e separado do río por unha forte pendente, non presenta terreos destinados á labranza. Os estudos revelan que as persoas que o habitaban dedicábanse á explotación de minas de ouro a beiras do río Eo e do río Navia.
O equipo de arqueoloxía descubriu un total de oito vivendas no castro, aínda que non todas están reconstruídas polo momento. Os expertos sorprendéronse polas grandes dimensións das casas destapadas. Unha delas dispuña de dúas plantas, cornixa para evitar a humidade e un sistema de drenaxe.
Con todo, a edificación máis destacada é unha sauna. Esta construción termal é unha das máis grandes e das que mellor se mantén na zona a pesar do paso dos anos.
A estrutura presenta varias salas e está cuberta por unha falsa cúpula. Os arqueólogos cren que se trata dun espazo comunitario, quizais destinado a rituais ou cerimonias de purificación.
Os últimos traballos de escavación levaron a cabo no mes de outubro do ano pasado coa axuda da Deputación.
