Unha das principais novidades ao comezo deste novo curso escolar, segundo informou a propia Delegación Territorial da Xunta de Galicia, ten que ver na provincia de Lugo coa suma de tres "novas unidades" escolares derivadas do aumento de matrícula nalgúns centros e, de forma especial, a reapertura do colexio de Negueira de Muñiz.
O delegado territorial da Xunta de Galicia, José Manuel Balseiro, que este mércores visitou o colexio Luís Pimentel de Lugo con motivo do inicio do curso, destacou o feito de que o colexio de Negueira de Muñiz reabra as súas portas logo de sete anos pechado.
De feito, precisou que ese colexio pechou as súas portas no ano 2012 por falta de alumnos, pero agora reabre con cinco nenos matriculados, grazas á natalidade asociada aos asentamentos de Ernes e Barcela.
Balseiro quixo valorar o feito de que unha "escola rural" reabra na Montaña de Lugo, onde se nota especialmente o declive demográfico, e ademais no municipio "máis pequeno de Galicia" por número de habitantes.
