Os militantes do PSOE de Becerreá celebraron este martes a súa asemblea para elixir a nova executiva local. A nova dirección está formada por Carlos Pereira (secretario xeral), Ana Rubinos (secretaria de organización) e Hipólito Santín (secretario municipal).
Ana Rubinos, que tamén exerce como portavoz do grupo municipal socialista na corporación becerrega, sinalou como un dos principais obxectivos da nova directiva facer "un partido forte e cohesionado", que ofreza unha alternativa aos veciños.
Estas palabras teñen un especial significado, se se ten en conta os episodios especialmente convulsos que viviu a formación socialista de Becerreá con motivo do enfrontamento entre o goberno provincial e Manuel Martínez por mor de Suplusa e que desembocou na expulsión deste último do partido.
Tras este episodio, o PSOE de Becerreá non só viu como en maio deste ano perdía ao que fora alcalde desde 2007, senón que con el dábanse de baixa outros seis edís do goberno local para pasarse ao grupo dos non adscritos.
Tras esta masiva espantada, o grupo municipal socialista quedou en Becerreá cunha única concelleira, Ana Rubinos, número 8 da lista de 2015, e que agora pasa a tomar responsabilidades como secretaria de organización.
De cara ás próximas eleccións municipais, o PSOE ten o difícil obxectivo de repetir os bos resultados que conseguiu no seu día Martínez. Para logralo, Rubinos indicou que a súa formación non escatimará esforzos e sinalou que os socialistas "comezamos unha nova etapa chea de ilusión, na que traballaremos para obter un bo resultado". Tamén incidiu en que a base do seu proxecto será "desenvolver políticas sociais que redunden no benestar dos veciños e non en intereses persoais".
O secretario provincial socialista, Álvaro Santos, que acompañou á nova executiva, tamén mostrou a súa confianza neste equipo e dixo que "farán un grande esforzo para que Becerreá mellore".
