Logo de residir en Nova York, París ou Madrid, Pedro Álvarez decidiu darlle unha volta á súa forma de vida. Como gran parte do seu traballo, o de deseñar e rexenerar baterías industriais, pode facelo desde calquera lugar, decidiu que ese lugar fose un pobo.
E as voltas, en realidade, foron moitas, como tantas veces pasa cando para descubrir o que está moi preto primeiro hai que viaxar moi lonxe. Así que, logo de percorrer a Sierra de Gredos ou o Prepirineo, Pedro preguntouse que sería da casa familiar materna na aldea naviega de Barcia, que el apenas coñecía. Nunca imaxinase que acabaría vivindo e traballando alí. “Estas cousas, se as pensas e planifícalas, non saen ben”, pensa.
Ademais de facer de Barcia o seu lugar de residencia, logo da reforma integral da casa familiar que levou a cabo hai cinco anos, Pedro Álvarez está a piques de lanzar o primeiro coworking rural de Galicia, e probablemente o primeiro de España. Tampouco isto estaba nos seus plans, pero ao decatarse das axudas de Agader a través do GDR Montes e Vales Orientais decidiu ofrecer a outras persoas o que a el lle había costado tanto atopar.
Antes de instalarse na casa familiar, Casa Quiñones, Álvarez buscara a experiencia de desconectar da cidade nalgunha casa rural e traballar desde alí. Pero isto non resultaba fácil. “ás veces fallaba a conexión a internet ou outras tiñas que traballar nun espazo común coa televisión acesa, ou non tiñas autonomía para cociñar, por exemplo”, indica. “Non son lugares pensados para traballar nin para pasar unha tempada”, engade.
Pedro Álvarez: "Pretendo dar opcións para conciliar o persoal co profesional e ter máis calidade de vida"
O que el ofrece agora son unhas instalacións dotadas con fibra óptica, distintos espazos de traballo, entre eles un despacho individual, e tres apartamentos. Se por unha banda a crise do coronavirus interrompeu unha breve apertura en febreiro na que xa tivo dúas estancias, doutra banda cre no futuro deste proxecto “agora que se demostrou que o teletrabajo é posible, polo menos en parte, e que ata este momento habiamos infrautilizado moitas das ferramentas tecnolóxicas das que dispuñamos e que nos vimos obrigados a pór en marcha”, comenta.
CONCILIAR. Tal e como o foi para el, Pedro espera que a Casa Quiñores sexa un lugar que permita conciliar a vida laboral coa vida persoal. “Pode ser unha boa opción para parellas que teñen vacacións en distintos momentos, para amigos ou para calquera persoa soa”, comenta. “Para espremer un pouco máis a vida, en definitiva, porque o que a min me levou a cambiar foi o negarme a que o traballo o absorba todo”, engade.
Para el, esta é ademais unha das vías que o rural debería explorar. “Se a xente segue vivindo aquí, o rural non é un gasto. Unhas ovellas limpando o monte son máis baratas que unha brigada, por exemplo. E, se temos internet, desde aquí é posible realizar moitos tipos de traballo distintos”, comenta.
Moi lonxe tivo que ir Pedro Álvarez, si. Con todo, en Barcia aos dous días xa lle chamaban polo seu nome. “Nesta casa naceu a miña nai, a miña avoa, o meu bisavó... e os veciños cóntanme constantemente cousas da miña familia, da Casa Quiñones”, comenta.
A pesar desa proximidade, si que é certo que nestes anos botou de menos o poder coñecer a persoas distintas, como facía nas grandes cidades nas que viviu. Pero agora, con este proxecto, quere porlle solución tamén e iso. E espera que outras persoas sigan os seus pasos, aínda que para iso haxa que dar moitas voltas.
