O inicio da tempada de poxas de xatas preñadas da Asociación de Criadores de Raza Rubia Galega (Acruga) non puido ter mellor arranque. O sol e o bo tempo fixo que o mercado gandeiro de Becerreá enchésese de público para seguir unha poxa que supuxo unha nova marca de cotización, ao alcanzar os animais vendidos un prezo medio de 2.290 euros.
Na poxa participaron un total de 27 cartóns correspondentes a outros tantos posibles compradores e non só se lograron vender as cinco xatas preñadas que se puxeron á venda, senón que todas elas alcanzaron unha cotización moi superior aos 1.800 euros que tiñan como prezo de saída.
A venda do primeiro exemplar da mañá xa marcou a tónica do que serían o resto das poxas. Moitos compradores e poxas abertas e longas, nun mercado que presentaba un ambiente inmellorable. Os tres primeiros exemplares adxudicáronse por 2.300, 2.100 e 2.050 euros a un mozo gandeiro de Friol.
Esta mesma persoa foi tamén a que se fixo co seguinte exemplar. Unha xata de 25 meses de idade, preñada de sete meses e medio e que despois dunha rifada poxa marcada por unha sa rivalidade adxudicouse por 2.650 euros, o prezo máis alto da xornada e que estivo a piques de bater os 2.700 euros que se chegaron a pagar neste mesmo mercado por outra xata poxada en 2014.
A última xata da xornada tamén foi das máis cotizadas, xa que se adxudicou a outro gandeiro por un prezo final de 2.350 euros. Como é habitual, todos os compradores contaron cunha axuda de 200 euros por animal, achegada por Caixa Rural.
A alta cotización dos animais poxados foi unha das notas máis positivas da poxa deste martes, na que se alcanzou o prezo medio máis elevado das sete que ata agora se celebraron en Becerreá. De feito, hai que remontarse ao ano 2014 para atopar uns resultados tan bos. Naquela edición, o prezo medio alcanzado foi de 2.245 euros.
Entre o numeroso público que se deu cita no mercado gandeiro de Becerreá destacou a presenza dalgunhas personalidades, como a do alcalde deste mesmo municipio, Manuel Martínez, acompañado polos rexedores de Navia de Suarna, José Fernández; de Pedrafita do Cebreiro, José Luis Raposo, e de Cervantes, Benigno Gómez, ademais do presidente de Acruga, César Dorado.
GANDEIRO DE FRIOL. A nota máis significativa da poxa deste martes é que catro das cinco xatas vendidas fóronse para a mesma explotación de Friol, que comparte o matrimonio formado por Rubén Penín Rouco e Ángeles Puente Rey.
Ambos levan as rendas desta gandería familiar desde hai uns oito anos e nestes anos xa se fixeron habituais nas poxas de Acruga. De feito, Rubén Penín Rouco recorda que nunha poxa celebrada hai un tempo no propio centro de recría xa adquirira outros once exemplares.
Sobre a raza e os resultados das xatas procedentes do centro de recría no que colaboran Acruga e a Deputación, este gandeiro móstrase rotundo, "é unha raza que hai que saber levala, pero que dá moi bos resultados".
