O pleno da Fonsagrada aprobou o martes reclamar á Xunta e á Deputación de Lugo a creación dun miniparque de bombeiros no municipio. A moción, levada á sesión plenaria polo grupo socialista no goberno, contou co respaldo do Partido Popular e a abstención do BNG. O alcalde do municipio, o socialista Carlos López, explicou que este parque daría servizo aos concellos da Fonsagrada, Negueira de Muñiz, Ribeira de Piquín e, posiblemente, tamén a Baleira.
O portavoz popular, José Luís Regueiro, manifestou que ·sempre estaremos a favor de todos os servizos para o noso concello", á vez que criticou o "cinismo" do PSOE en materia de urxencias, "xa que despediu 12 traballadores do GES anterior e agora dar conta de que hai carencias", comentou. Regueiro tamén afeou ao alcalde que rexeitase "a proposta popular para solicitar un novo Grupo de Emerxencias Municipal (GES)", comentou.
Ese foi o motivo para que a edila nacionalista, María Xosefa Ortiz, se abstivese na petición do miniparque. Recordou que nun pleno anterior aprobouse unha moción para que se solicitase un novo GES para o municipio, "pero non foi tramitada polo equipo de goberno, o que supón unha falta de respecto ás decisións plenarias", comentou. A estas críticas, o rexedor fonsagradino respondeu que "existe un acordo entre a Fegamp e a Xunta para que sexa Baleira quen asuma ese GES".
Na sesión aprobouse unha transferencia de crédito de 115.000 euros e a solicitude de obra de interese xeral para a Senda do Navia
Ademais, o pleno aprobou unha transferencia de crédito de 115.000 euros, coa abstención do BNG e o voto en contra dos populares, que criticaron que o Bloque cambiase de criterio, "xa que en plenos anteriores pediu unha maior transparencia", indicou Regueiro, ao que Ortiz respondeu que "era urxente desatascar a situación dun goberno que apoiamos". Ese importe destinarase, segundo detallou López, á Policía Local, abastecementos, subministracións e ao canon da CHMS.
O PSOE levou outra proposta para declarar obra de interese xeral a Senda do Navia, que se aprobou co apoio do PP. O BNG votou en contra ao considerar que "antes da promoción turística precisamos acometer obras pendentes, como a estrada de Navia".