O trixésimo concurso-exposición de gando vacún de Pedrafita superou as expectactivas e, se nos días previos se anunciaba que habería un centenar de reses, a cifra disparouse finalmente ata unhas 170, de 40 ganderías de diferentes puntos da provincia e da veciña León. A asociación Acruga aproveitou esta cita organizada polo Concello, un referente para o sector na Montaña, para poxar catro cuxas.
O mercado gandeiro, epicentro do evento, encheuse de numeroso público, desde curiosos que querían ver as reses levadas a concurso ata gandeiros interesados en facerse con algunhas.
No certame, dentro do apartado de raza rubia, o premio ao mellor lote recaeu en José Antonio Ferreiro Palacios, do Corgo. O mellor touro tamén foi un da súa explotación, mentres que o fonsagradino Antolín Alonso Arias presentou a mellores vaca e cuxa. Entre os xatos, o xurado decantouse por un presentado pola gandería corguesa Santalla.
Polo que se refire á raza asturiana dos vales, o mellor lote foi o do berciano Iván Fernández López, gañador tamén nas categorías de touros, vacas e novillas. O mellor xato presentouno a fonsagradina Ana Rosa Alonso Arias. No cadro de honra tamén estiveron o produtor local José Manuel Trobo Espín e o cervantego Javier Santín González.
Para rematar, entre os tenreiros para carne, gañou un de José Manuel Teijeira Montero, do Courel. Marta Espín Díaz, de Triacastela, e Ana María Blandón Martínez, do Courel, fixéronse co segundo e o terceiro premio.
Na entrega de galardóns, o alcalde, José Luis Raposo, estivo acompañado, entre outras autoridades, polo presidente da Deputación, Darío Campos, e a subdelegada do Goberno, Isabel Rodríguez.
En canto á poxa de Acruga, as catro cuxas adxudicáronse a un gandeiro local ao prezo de saída (1.800 euros por res).
