"Pedíronlle recibos da luz para ver onde os gardaba e roubáronlle o que alí tiña"

Varios veciños de distintas aldeas da Fonsagrada manifestaron nos últimos días ser vítimas de roubos ou estafas perpetrados por cacos que se fan pasar por revisores da luz dunha compañía eléctrica para poder desta forma entrar nos domicilios.

Os perfís das súas vítimas adoitan ser de persoas maiores. Así foi no caso da nai dun veciño que prefire non revelar a súa identidade, que conta como os falsos revisores acudiron ao domicilio da muller hai uns meses, ofrecéndolle vantaxes de aforro sobre o seu contrato actual. "Pedíronlle unha factura para ver onde as gardaba, e ao pouco tempo desapareceron todos os cartos que alí tiña", indica, cantidade que cifra nuns 200 euros.

A súa sogra foi vítima da mesma estratexia hai uns días. Con todo, deduce que neste caso os cacos lle dixeron que tiña os papeis en orde ao ver que había dous grandes mastíns nesa propiedade. As medidas de seguridade fronte ao coronavirus tamén fixeron que a súa sogra non chegase a permitir a entrada dos falsos revisores no interior da vivenda, como medida de prevención.

A Garda Civil non rexistrou polo momento ningunha denuncia referida a estes delitos na Fonsagrada, pero si unha de estafa das mesmas características na comarca da Mariña hai apenas unha semana.