Patrimonio dos Ancares esixe á Consellería de Cultura e ao Obispado de Lugo o arranxo da igrexa de Penamaior, en Becerreá. O colectivo enviou este xoves sendas notificacións ás dúas administracións para que procedan canto antes a restaurar o templo, declarado Monumento Histórico Artístico de carácter nacional no ano 1982 e Ben de Interese Cultural (BIC) no 1985.
Desde a entidade solicitan, entre outras cousas, que no exterior se proceda ao arranxo dos danos que presenta a fachada principal, á eliminación duns ferros de metal situadas entre unha fiestra e o campanario, ao acondicionamento da cabeceira na que se atopan as ábsidas románicos e á retirada da vexetación que rodea o templo. Ademais, piden que no interior se cambie a madeira do chan da sancristía, se oculten os cables eléctricos e se acometan a restauración do retablo central de época barroca que "se atopa en moi mal estado de conservación", precisan.
Desde Patrimonio dos Ancares piden tamén que se instalen sinais de dirección en varios lugares do concello para facilitarlle aos visitantes a súa localización. Solicitan ademais que nas inmediacións do conxunto procédase a instalar un panel que explique a historia deste conxunto relixioso "pois a pesar de atoparse non moi lonxe da capitalidade lucense, dunha estrada nacional e dunha autovía, é un gran descoñecido para moita xente", asegura o presidente do colectivo, Xabier Moure.
MOSTEIRO. A entidade pide que as administracións inicien as conversacións pertinentes cos propietarios do mosteiro que se atopa pegado á igrexa para que pase a ser de titularidade pública, pois segundo alertan, "actualmente xa pouco queda desta edificación".
Desde Patrimonio dos Ancares esixen que se acometan de forma urxente as obras de reparación do monumento e recordan que "a lei 5/2016 do Patrimonio Cultural de Galicia, non seu artigo 6, establece que a Igrexa católica, propietaria dunha boa parte do patrimonio cultural de Galicia, velará pola protección, conservación, acrecentamento e difusión do mesmo, colaborando a tal fin coa Administración. Unha comisión mixta entre a Xunta de Galicia e a Igrexa católica establecerá o marco de colaboración e coordinación entre ambas as institucións para elaborar e desenvolver os plans de intervención conxunta".
Engaden que o artigo 32 da mesma lexislación contempla que as persoas "propietarias, posuidoras e, en xeral, as titulares de dereitos reais sobre bens protexidos integrantes do patrimonio cultural de Galicia están obrigadas a conservalos, mantelos e custodialos debidamente para evitar a súa perda, destrución ou deterioración".
Neste sentido o colectivo presentou unha solicitude ante o Concello de Becerreá para que realice as xestiones necesarias ante a Xunta e o Obispado de Lugo para que se acometan as obras de acondicionamento e restauración descritas.
HISTORIA. Penamaría pertenceu a un mosteiro cisterciense fundado por monxes do Bierzo. Converteuse en abadía en 1225, condición que mantivo ata o 1505, cando pasou á congregación de Castela, quedando unido a San Salvador de Salamanca e perdendo a calidade abacial. En 1836, a raíz do decreto de desamortización de Mendizábal, o mosteiro quedou practicamente desmantelado e pasou a mans privadas. O conxunto xogou un papel fundamental ao longo dos séculos e actuou como hospital e refuxio de peregrinos. A fachada sufriu alteracións barrocas no século XVIII, pero conserva elementos románicos do século XII.
