O cineasta Oliver Laxe e o presidente da cooperativa A Carqueixa, José Antonio Díaz, presentaron este luns unha campaña audiovisual online para promocionar e difundir a gandería heroica dos Ancares.
En concreto, o proxecto, dirixido polo cineasta, darase a coñecer nas redes do Sabor dos Ancares, a iniciativa de comercialización directa de tenreira galega suprema da cooperativa A Carqueixa, emprazada nesta área.
A iniciativa componse de vídeos curtos a través dos cales Laxe difunde as artes, manexos e xeito de vivir das persoas que integran a cooperativa, habilidades que considera "gandería heroica" que mantén vivo Os Ancares.
"Estamos a falar de moitas décadas na que o mundo díxolles que o facían non era lóxico nin rendible nin racional. Con todo en contra, coidaron dos Ancares con esas invisibles vacas libres que salpican a paisaxe, esas que fan a transhumancia ata Os Ancares bercianos, con todo o que iso implica a nivel cultural, paisaxístico e ambiental", destaca Oliver Laxe.
Ademais, subliñou que esta campaña pon o foco "sobre o traballo milenario que seguen facendo os pastores" nesta zona, a través do pastoreo extensivo, e asegurou que cando se compra esta carne "está a protexerse un modo de vida e uns valores" que garanten a biodiversidade dos Ancares.
COMERCIALIZACIÓN DIRECTA. Actualmente, a cooperativa A Carqueixa está centrada na súa iniciativa de venda directa ao consumidor, O Sabor dos Ancares. A través da web www.osabordosancares.com a súa tenreira galega suprema en lotes e ao corte, que chega directa á casa dos consumidores unha vez fan o seu pedido na tenda online.
O proxecto conta con menos de dous anos de vida e supón xa o 30% das vendas da cooperativa. Entre outros clientes, destaca a aposta por esta carne realizada desde Inditex para os seus comedores.