As obras para recuperar o viaduto da A-6 obrigan a modificar os desvíos desde este venres

Deste xeito, a partir das 8,00 horas da mañá modificaranse os desvíos de tráfico existentes actualmente e ou se permitirá o paso a transportes especiais entre os quilómetros 428 e 432
Viaducto de Castro. VICTORIA RODRÍGUEZ
photo_camera Viaducto de Castro. VICTORIA RODRÍGUEZ

O Ministerio de Transportes e Mobilidade Sostible vai comezar unha nova fase nas obras de reconstrución dos dous viadutos da A-6 no Castro, que conectan Veiga de Valcarce (León) e Pedrafita do Cebreiro (Lugo), co obxectivo de que este mesmo ano quede recuperado o que vai en sentido Madrid. 

Desta forma, a partir das 8,00 horas da mañá deste venres modificaranse os desvíos de tráfico existentes actualmente, entre os quilómetros 428 e 432, para así poder adoptar as novas configuracións que permitan avanzar nas obras. 

Por unha banda, pecharase o desvío que comunica de forma directa a A-6 coa N-6 no quilómetro 431 para proceder ao seu desmonte, que é o percorrido que fan os vehículos lixeiros para evitar pasar polo centro de Pedrafita. Así, todo o tráfico en sentido Madrid, tanto pesados como lixeiros, utilizará a saída 432 para acceder á travesía de Pedrafita e circular pola nacional ata reincorporarse á autovía no quilómetro 428. 

Doutra banda, modificarase o 'bypass' que hai no quilómetro 428 da A-6 para permitir o paso directo de vehículos a través da propia autovía. Isto obrigará a operar con tráfico en dobre sentido na A-6 en sentido A Coruña entre os quilómetros 422 e 428. Por iso, non se permitirá o paso a transportes especiais entre os quilómetros 428 e 432.

Comentarios