A Deputación de Lugo despregou a 27 operarios e 18 máquinas e vehículos para limpar as estradas da rede viaria provincial que se viron afectadas polas nevadas da pasada noite. En concreto, o dispositivo despregado pola institución provincial traballa en 57 vías de sete concellos da zona da montaña lucense.
Os equipos facilitaron a circulación e garantiron a seguridade despexando as calzadas de neve e xeo, e atendendo as incidencias producidas durante a madrugada deste venres. Os concellos afectados son Folgoso do Courel, Cervantes, A Fonsagrada, Navia de Suarna, Negueira de Muñiz, Pedrafita do Cebreiro e Quiroga. Durante a primeira hora deste venres, nas vías destes municipios transitouse con dificultade polas nevadas das últimas horas e o xeo, aínda que non chegou a cortarse ningunha vía.
O dispositivo de seguridade mobilizado pola Deputación de Lugo está formado por 27 operarios, nove máquinas quitaneves con salero e nove vehículos todoterreo de apoio. Así mesmo, os 12 silos de sal da Deputación dispoñen de 35 toneladas cada un para desfacer as placas de xeo que hai no firme e favorecer así a seguridade dos usuarios e usuarias das vías.