Galicia afronta unha semana de ceos nubrados e choivas intermitentes, especialmente na franxa atlántica, unha situación que podería mellorar de face ao fin de semana. Con todo, non se espera que volva nevar nas zonas altas da comunidade, como ocorreu este luns.
NEVADAS O LUNS. Logo de case un mes de tempo estable e temperaturas diúrnas case primaverais, o temporal de vento e choiva do domingo deixou paso á neve durante a xornada do luns, cubrindo de branco os puntos máis altos da provincia de Lugo. O feito de que as precipitacións fosen máis ben escasas evitou problemas de relevancia, aínda que na LU-633, estrada que une Pedrafita do Cebreiro con Sarria, a DXT activou o aviso de circulación condicionada entre os quilómetros 0 e 19.
Así, durante toda a xornada foi necesario circular con precaución en ambos os sentidos, aínda que a vía estivo transitable en todo momento, grazas en boa parte ao labor realizado polas máquinas quitaneve.
A neve tamén chegou a outros puntos altos da provincia, pero sen afectar o tráfico. O alto de Hospital/Muradal (A Fonsagrada), Piornedo (Cervantes) ou Vilarbacú (Quiroga) foron os lugares nos que houbo maior acumulación.
A cota de neve foi ascendendo ao longo da xornada desde os 800 aos 1.000 metros. Durante toda a semana, a provincia estará nunha situación entre as baixas e as altas presións, o que ocasionará un tempo variable, aínda que con temperaturas en lixeiro ascenso e escasas precipitacións.
