A formación, a conservación da natureza, o traballo tradicional e a apicultura son os alicerces cos que Alberto Uría traballa para levantar El país del abeyeiro, un proxecto que podería ver a luz na primavera do próximo 2019 en Negueira de Muñiz, e que o seu creador define como "unha aula natural".
"Vai ser unha escola taller, un ecomuseo e un centro de formación ligado a aspectos ambientais", explicou Uría.
O promotor do proxecto é un emprendedor asturiano con raíces en Negueira de Muñiz. "O meu pai é de aquí. Eu nacín en Oviedo, pero xa levo case unha década vivindo en Negueira de Muñiz, dedicándome á apicultura. Agora levo algo máis, traballo con máis tipos de polinizadores, non só con abellas, e a miña idea é botar a andar un lugar no que a xente poida aprender de apicultura, pero tamén de botánica, de micoloxía ou de insectos", comentou.
A Xunta de Galicia, a través do GDR Montes e Vales Orientais, impulsa con 74.300 euros –o 50% do investimento inicial– a posta en marcha de El país del abeyeiro. O delegado da Xunta en Lugo, José Manuel Balseiro, visitou este martes as instalacións da firma e destacou as posibilidades dun proxecto "respectuoso" co medio ambiente, que permitirá "xerar tecido económico, social e cultural na comarca".
A empresa, instalada nunha aldea que estaba abandonada como Pena da Nogueira, "xa deu probas do dinamismo que quere imprimir na zona", segundo palabras do propio Balseiro.
"Estou a intentar implicar a todo o mundo. Se por exemplo imparto un curso de dez ou quince horas, dunha fin de semana, que as persoas que o cursen durman aquí ou vaian comer ao municipio", engadiu Alberto Uría.
O emprendedor confía en que o proxecto estea totalmente operativo na primavera: "Estou a terminar as obras e esperemos que tras o inverno estea listo".