Un incendio orixinado na cheminea da calefacción provocou enormes danos no Caserío Meiroi, negocio de restauración situado na parroquia de Mosteiro (Navia de Suarna).
O lume pronto se estendeu por todo o edificio, e aínda que non houbo que lamentar danos persoais (o persoal e os comensais que se atopaban no comedor pronto foron desaloxados), todo o que había no inmoble quedou arrasado polas chamas.
A alerta saltou pouco logo das tres da tarde. Ata o lugar dos feitos trasladáronse membros do parque comarcal de bombeiros de Sarria e o GES de Becerreá, que lograron estabilizar as chamas.
