Os veciños de Navia de Suarna viviron este domingo un anómalo día de festa e quedaron sen a sesión vermú das súas patronais, ao confundirse de destino a orquestra e dirixirse á vila homónima asturiana. Cando se deu conta do erro e rectificou o rumbo, un control rutineiro de Tráfico atrasou aínda máis a súa chegada, ata as tres da tarde.
Esa foi a explicación que deron os responsables da formación ao goberno local, segundo indicaba o domingo pola tarde o alcalde naviego, José Fernández Fernández, contrariado por que esa confusión restase brillo ao mediodía aos festexos, aínda que agradecido pola comprensión da xente que enchía a praza principal de Navia de Suarna.
A xornada festiva empezou sen contratempos, coa chegada da banda lucense Lucus Ensemble para actuar na misa ás 13.30 horas. No entanto, causou inquietude a tardanza en chegar da orquestra pontevedresa Essencia, encargada de amenizar a sesión vermú e á que se esperaba sobre as 12.30, para que lle dese tempo a ter todo listo para tocar logo dos oficios relixiosos.
Como non aparecía, desde o Concello puxéronse en contacto co grupo, que se desculpou e dixo que se confundiu ao introducir os datos da localidade de destino no navegador, xa que puxeran os da Navia asturiana. Ademais, segundo explicaron, cando cambiaron de ruta tiveron que parar durante o traxecto, preto da Pontenova, ao atoparse cun control de Tráfico.
O rexedor naviego comprendía que non houbo mala fe, porque a orquestra si que finalmente apareceu, pero lamentou que, ao facelo ás tres da tarde, se deslocese o festexo. Ante ese contratempo, a banda Lucus Ensemble estirou a súa actuación ao mediodía para os veciños e visitantes.
Aínda que con atraso, polo menos a chegada ás tres da orquestra Essencia garantiu que habería verbena, que tamén se lle contratou e que se celebrou sen contratempos.
LUNS. A festa continuará este luns cunha sesión vermú a cargo da orquestra Alaska. Ás catro da tarde arrincará unha comida campestre nas Veigas, animada pola charanga Mekánika, e na verbena actuará de novo Alaska.
