O Museo Etnográfico Comarcal da Fonsagrada recibiu 1.956 visitantes durante o pasado 2018, unha cifra moi similar á a que se rexistrou en 2017, cando pasaron polas instalacións 1.980 persoas.
O mes con mellores resultados do ano foi, con diferenza, agosto, cun total de 371 visitantes. Completaron o podio maio, con 198, e xullo, con 196. O pasado 2018 variou o patrón habitual do museo fonsagradino, que normalmente ten o seu pico en febreiro, coincidindo coa Feira do Butelo e a tempada de cocidos, que sempre levan á localidade a multitude de persoas. Con todo, as fortes nevadas que coincidiron coa feira impediron que as cifras sobresaísen no segundo mes do ano, que tivo que conformarse con 114 visitantes.
Na outra cara da moeda estivo novembro, cando unicamente se rexistraron 64 visitas, o único mes de todo 2018 que quedou por baixo das cen.
Cabe destacar que, ao longo de todo o ano, o museo recibiu un total de 22 excursións grupales, vindas desde distintos puntos da provincia pero tamén de lugares como Xixón, Cangas del Narcea ou Viladecruces.
O centro fonsagradino acolleu varias exposicións temporais ao longo do ano, completando así a súa oferta á mostra permanente, que exhibe numerosas mostras etnográficas da comarca, como oficios tradicionais, obxectos antigos propios do campo ou utensilios que abundaban outrora nos fogares.
Así, entre as mostras temporais púidose visitar unha exposición de pintura do artista local Pedro Núñez; a exhibición Apostar polo galego na publicidade, unha recompilación de anuncios e carteis en galego de varias épocas; unha colección de Manuel Oreste Rodríguez López, o poeta de Paradela emigrante en Barcelona e encargado de promover diversas actividades para os galegos residentes na capital barcelonesa; ou a máis recente, que chegou ao museo a finais de novembro por cortesía do Museo do Pobo Galego: a Galicia máxica do folclorista e historiador Gustav Henningsen, que recolle imaxes tomadas nos anos 60 polo etnógrafo.
Á espera de conseguir o financiamento
O director do museo fonsagradino, Xoan Xosé Molina, explicou que pronto saberán se dispoñen das subvencións necesarias para acometer a ampliación do centro. "Están aí xa os prazos de Agader para facer formais as solicitudes. O certo é que necesitamos tamén o apoio da consellería de Cultura e da Deputación porque Agader non cubrirá todo o custo, pero o certo é que despois de falar cos órganos dá Axencia Galega de Desenvolvemento Rural, encaixamos bastante e confío en que poidamos ter o financiamento".
200.000 euros
A ampliación do museo da Fonsagrada necesitaría un investimento aproximado de entre 150.000 e 200.000 euros. As actuacións, entre outras cousas, contemplan unha galería que rodearía o edificio, deixar libre a sala de exposicións, ampliar a zona de arqueoloxía ou un edificio multiusos.
