Os humanos non esquecen. E as mascotas tampouco. Acábano de demostrar Brais Álvarez e Leo, o can dos seus avós, que desapareceu hai dous anos en Paradiñas, na Fonsagrada e que hoxe volve estar en casa grazas a unha afortunada casualidade.
A familia levou un desgusto pola perda do animal e fai moito que perderan as esperanzas de atopalo. Pero as casualidades felices existen. E é que, hai unhas semanas, Brais atopou nas redes sociais a foto dun can acollido na Protectora de Animais de Lugo e de inmediato tivo o pálpito de que aquel can era Leo.
O mozo plantouse inmediatamente nas instalacións da Protectora e alí as dúbidas disipáronse inmediatamente. O can recoñeceuno en canto o viu e o mozo lucense soubo que atopara á mascota do seu avó. O único triste da historia é que o avó xa faleceu e non tivo oportunidade de volver estar con Leo e ver o afecto que o animal gardaba pola familia.
Brais levou ao can a casa xa o mesmo día que foi á Protectora a comprobar a súa intuición. A forma na que lle recibiu o animal e a comprobación dunha marca na orella deixaron claro que aquel era o can da súa familia. Él sabía que tiña que rescatar ao animal e na Protectora tamén viron que aquela era a historia dun afortunado reencontro.
O mozo lucense recoñeceu sen ningún xénero de dúbida ao animal, e iso que o paso pola Protectora non lle deixou nas mellores condicións. Conta que lle explicaron que o can chegara ao albergue hai aproximadamente un ano. Atopáranllo en boas condicións, coma se alguén estivese coidándoo, pero os meses de acollida fixeron madeixa no animal, que sufriu como todos os que viven na Protectora, por moito que haxa un equipo de profesionais e moitos voluntarios que se esforcen por telos nas mellores condicións posibles.
Leo volve estar agora na Fonsagrada, con Avelina, a avoa de Brais. O mozo conta que a muller está encantada de ter ao animal de volta en casa.
E Leo está tamén feliz da súa volta ao fogar, onde dá compañía a Avelina e comparte vida co resto de cans da familia. Agora, conta o mozo, só volverá a Lugo con el para algunha visita ao veterinario.
