Xabier Moure, presidente de Patrimonio dos Ancares, alerta do mal estado dunha ponte de madeira nun camiño habilitado como ruta de sendeirismo en Cervantes. Segundo detalla, ese paso salva o río das Casas, na aldea de Fabal, e está a poucos metros da estrada LU-723.
Moure subliña que a gran viga central de madeira que actuaba como soporte rompeu, polo que "resulta extremadamente perigoso cruzala". Engade que habería que asegurar varias táboas transversais e cambiar outras moi deterioradas.
Destaca que a ponte está nunha ruta moi transitada, por estar xunto á Vía XIX e ser paso obrigado para un muíño e un castro, polo que pide ao Concello que interveña.