A xunta directiva da Asociación de Desenvolvemento Rural Montes e Vales Orientais (ADR3) aprobou na súa última reunión un orzamento de distribución de fondos de 760.000 euros para apoiar diferentes proxectos na comarca da Montaña dentro da convocatoria 2021-2022.
O 65% dese orzamento irá destinado a proxectos produtivos, mentres que o 35% restante irá a iniciativas non produtivas impulsadas por entidades tanto públicas como privadas.
Entre os acordos alcanzados tamén destaca a creación dunha rede de entidades locais colaboradoras para incentivar a mobilidade de terras. A finalidade é promover os instrumentos necesarios para pór en valor as terras abandonadas, a través dunha rede que estará integrada por colectivos de mulleres, gandeiros, forestais, cooperativas e comunidades de montes, entre outras entidades.
Entre as demais iniciativas para contribuír á dinamización da comarca aprobouse continuar coa promoción do mel da Montaña, pondo as ferramentas necesarias para que os pequenos produtores poidan entrar no mercado online.
PALLOZAS. Tamén se vai a levar a cabo un estudo para avaliar o actual estado das pallozas, co obxectivo de cuantificar aquelas que poden ser recuperables e estimar os custos de rehabilitación.
Dentro do plan de acción para o ano 2021 do Geodestino Ancares Terras de Burón, está previsto incrementar o número de empresas adheridas ao produto turística Cociña de Ancares Terras de Burón, das 78 actuais ata as 100. Tamén se promoverá a colaboración con outros territorios limítrofes con Asturias para potenciar a Senda do Navia.
Outros dos acordos teñen que ver coa colaboración nos programas Vives Emprende e Volver ao Pobo, que buscan apoiar ás persoas que queiran emprender o en rural, así como facilitar unha plataforma de vivendas en venda ou aluguer e ofertas de emprego para aquelas persoas que queiran residir no rural.
