Boa parte dos pequenos municipios lucenses comezaron setembro libres de coronavirus, algo que se nota especialmente no sueste da provincia. Dentro dela sobresae a comarca da Fonsagrada, que se converteu nun oasis libre de Covid-19 desde a declaración do estado de alarma e pasou tamén sen contaxios os meses de xullo e agosto, marcados polo aumento de residentes polo regreso dos emigrantes e o turismo. A situación foi similar en varios municipios dos Ancares, onde a incidencia do coronavirus foi mínima ou nula, coa excepción dos casos puntuais rexistrados en Baralla e Pedrafita en agosto.
Na Fonsagrada e Baleira, por onde discorre o Camiño Primitivo e existe unha importante emigración a Madrid, Barcelona ou Bilbao, o verán discorreu sen sobresaltos. O rexedor fonsagradino, Carlos López (PSOE), apuntou que a pandemia podería contribuír ao regreso de xente ás zonas rurais. "Nos últimos meses houbo xente que se dirixou ao Concello para interesarse por casas na zona rural", precisou. Esta circunstancia fixo que o Concello fonsagradino acelerase a creación dunha base de datos de vivendas en venda ou aluguer, unha iniciativa que tamén desenvolverán outros concellos da zona.
Carlos López eloxiou a responsabilidade dos cidadáns do municipio, de 3.600 habitantes. Os seus homólogos de Baleira e Negueira de Muñiz tamén recalcan que non teñen constancia de ningún caso rexistrado a día de hoxe. Só saltou a alarma en Baleira, coa chegada de dous mozos peregrinos, a finais de agosto que presentaban síntomas, e que foron desviados ao Hospital Lucus Augusti para facer as probas.
De acordo co testemuño dos seus alcaldes, As Nogais, Navia de Suarna e Cervantes mantíñanse ata esta semana libres de coronavirus. "En Becerreá, si se rexistrou un positivo hai un tempo, que xa se incorporou ao traballo", segundo explica o primeiro tenente de alcalde, Claudio Vázquez.
Pedrafita superou o brote de Fonfría, con seis contaxiados e 35 persoas illadas, que xa pasaron o confinamento. O seu alcalde, José Luís Raposo (PSOE), criticou "a falta de transparencia da Xunta, que non ofreceu datos concretos ao Concello, nin nos informou sobre a evolución do brote localizado en Liñares".
O goberno galego, a diferenza doutras comunidades autónomas, non presenta os datos desagregados por municipios, pero as consultas efectuadas en distintos concellos, revelan que aqueles que non tiveron un só caso, ou algún brote accidental, son de carácter rural e teñen menos de cinco mil habitantes. Os rexedores prefiren ser prudentes á hora de manexar os datos, que son contabilizados pola Consellería de Sanidade en función da localización das cartillas sanitarias, e matizan que o feito de que non teñan constancia de contagios, non quere dicir que non os houbese ou que non se poidan producir nun futuro.
