O Diario Oficial de Galicia (DOG) publicou na súa edición deste martes a solicitude de rexistro da Indicación Xeográfica Protexida (IXP) Terras do Navia, que amparará os viños producidos na conca do río Navia. A publicación do prego de condicións que rexerá a calidade dos caldos da zona supón o primeiro paso de cara á súa inscrición no rexistro europeo.
A zona delimitada por este novo selo de calidade está situada no nordeste da provincia de Lugo e abarca todo o concello de Negueira de Muñiz, así como varias parroquias dos municipios veciños da Fonsagrada e Navia de Suarna.
Os trámites para a inscrición desta indicación xeográfica iniciounos a Asociación para a Defensa das Variedades Autóctonas e do Viñedo da Ribeira do Río Navia, que representa o incipiente sector vitivinícola da zona e que ten interese en distinguir os seus viños no mercado cun indicativo de calidade.
O prego de condicións desta IXP será aplicable tanto a viños brancos como tintos, elaborados exclusivamente con uvas autóctonas das variedades "branca albariño, branco lexítimo, godello e loureira" e, no caso dos tintos, coas variantes "albarín tinto, mencía, merenzao, brancellao e caíño tinto".
O prazo para a presentación de alegacións estará aberto ata o 22 de febreiro
Os promotores da iniciativa cren que a consecución deste selo de calidade "facilitará a comercialización das producións da zona e servirá para potenciar outras actividades económicas", sobre todo, aquelas destinadas a potenciar os servizos turísticos e outras producións agroalimentarias.
Paralelamente á súa publicación no DOG, a solicitude de inscrición da IXP Terras do Navia publicouse tamén no Boletín Oficial do Estado (Boe) do pasado 3 de decembro. Desde este martes e ata o próximo 22 de febreiro está tamén aberto o prazo para que calquera persoa poida presentar as alegacións que estime oportunas.
Unha vez que finalice o período de alegacións, o expediente será remitido ao Ministerio de Agricultura, Pesca e Alimentación para o seu envío á Comisión Europea. Alí será analizado e sometido a outro proceso de oposición, aínda que neste caso xa a nivel europeo, coa correspondente publicación no Diario Oficial da Unión Europea. Superada esta fase, xa se producirá a súa inscrición formal no rexistro, aínda que previamente o selo xa se podería usar en España.
