Ás veces é certo o dito de que non hai mal que por ben non veña. Isto pódese aplicar no caso do municipio de Cervantes, onde os devastadores incendios que se produciron en outubro de 2017 e que causaron un gran dano ambiental, permitiron sacar á luz un tramo duns catro quilómetros da histórica Vía romana XIX.
A necesidade de poñer en valor esta ruta foi unha das conclusións á que chegaron os expertos que participaron nas I Xornadas de Arqueoloxía e Historia de Ancares, que se celebraron durante esta fin de semana en Cervantes e que reuniron unhas 80 persoas.
Para divulgar este tramo, os participantes tiñan previsto realizar un percorrido a través deste trazado, desde San Miguel (Cervantes) ata o núcleo da Braña, no municipio leonés de Vega de Valcarce.
"O que imos reivindicar con esta camiñata é que se catalogue este tramo e que as distintas institucións se comprometan a mantelo", declarou Xabier Moure, do colectivo Patrimonio dos Ancares, que xunto ao Concello de Cervantes, o CPI da localidade e os concellos leoneses de Vega de Valcarce e Balboa son os organizadores desta iniciativa.
O castro de Santa María será en breve catalogado BIC, a mesma consideración que teñen os de Viladonga e Fazouro
Esta histórica vía centrou a actividade destas xornadas na mañá deste sábado. Os alumnos do IES de Becerreá presentaron un proxecto para poñela en valor, mentres que o arqueólogo da Xunta Rubén D. Álvarez Asorey ofreceu unha charla sobre o trazado deste itinerario.
Pola tarde, os participantes nestas xornadas desprazáronse ao castro de Santa María
Xabier Moure recordou este sábado a este medio que o castro de Santa María está a piques de ser declarado BIC, o que suporá para a zona un importante estímulo turístico. Neste sentido recordou que dos 1.300 castros contabilizados na provincia, só os de Viladonga e Fazouro contan a día de hoxe con esta distinción.
