O incendio que este mércores calcinou unha casa en Pena da Nogueira, no municipio de Negueira de Muñiz, avivou a polémica sobre a falta de servizos de urxencia da comarca da Montaña.
O feito de que fose o parque de bombeiros de Barreiros o mobilizado polo 112 tras recibir a alerta é significativo desa carencia, pois o tempo do desprazamento desde alí é de case dúas horas, a pesar de ser o máis próximo ao lugar, o que queda moi lonxe desa media hora en recibir atención a partir da cal o territorio se considera "zona de sombra".
O incidente tamén desatou a polémica sobre o desmantelamento do Grupo de Emerxencias Supramunicipais (GES) da Fonsagrada hai tres anos, que este mércores a delegación territorial da Xunta de Galicia en Lugo recriminou ao alcalde en funcións do municipio, Argelio Queipo, e tamén ao rexedor de Negueira, José Manuel Braña, por non oporse a esa eliminación do servizo,
FALTA DE COORDINACIÓN. A falta de coordinación tamén se deixou notar. Segundo indican fontes do dispositivo de Barreiros, cando xa estaban á altura dos Oscos, unha chamada transmitiulles que o incendio se declaraba extinto por parte dos bombeiros de Asturias, que chegaran antes á zona. Recibida esta chamada, regresaron a Barreiros, e de novo ao chegar indicáronlles que tiñan que volver a Negueira, pois o lume reavivouse e os bombeiros de Asturias esperaban a súa substitución, que chegou ás 1.30 horas.
RESPOSTA DE ASTURIAS. Como contraste, os servizos de urxencia asturianos responderon á alerta, dada polo fillo do propietario ás 18.45, en 45 minutos. Segundo fontes do operativo asturiano, á zona desprazáronse catro efectivos cunha autobomba forestal desde o parque auxiliar de bombeiros de Grandas de Salime, tres fectivos cunha autobomba forestal desde o parque auxiliar de bombeiros de Ibias, dous efectivos desde Cangas de Narcea e un helicóptero desde o parque central de bombeiros da Morgal (Llanera) para trasladar con rapidez tres efectivos ao lugar e comprobar que non se propagou o lume.
Con todo, cando chegaron os primeiros efectivos, a casa xa estaba calcinada. Ao ser de madeira, as chamas estendéronse rápido, alcanzando o tellado. Os seus ocupantes puideron sacar os animais e algunhas cousas de valor, pero a gran parte dos seus bens ardeu con ela. Afortunadamente ningún sufriu danos, e dispoñen doutra casa próxima onde vivir.
Máis atrasos
Baleira anunciou no 2017 que acollería o GES que rexeitou A Fonsagrada. O alcalde, Martínez-Puga, indicou este mércores que aínda había impedimentos legais para poder poñelo en marcha.
