Un incendio na madrugada do martes no concello berciano de Balboa, limítrofe coa provincia lucense, causou danos de consideración no retablo maior da igrexa románica de Santa Mariña. Os bombeiros de Ponferrada traballaron durante varias horas ata que conseguiron extinguir o lume sobre as nove da mañá.
Un veciño deu a voz de alarma sobre as 5.20 horas ao ver como saía fume das fiestras do templo, situado na capital municipal. Ao entrar na igrexa, os bombeiros comprobaron que o lume estaba a afectar á parte esquerda do retablo maior nunha zona duns tres metros de alto cunha anchura dun metro, aproximadamente. Ademais, tamén estaba afectado o zócalo inferior e a alfombra do altar.
Ante o valor histórico do templo -é Ben de Interese Cultural (BIC) desde 1993-, os bombeiros intentaron usar moi pouca auga nas tarefas de extinción e así «evitar un incremento de danos». Tamén retiraron tres pezas do altar maior que sacaron ao exterior. Tras sufocar o lume, procederon a ventilar a estancia para evitar que o fume acumulado no interior seguise causando danos.
A igrexa, erixida no século XII ou XIII e que tivo varias reformas, é dunha soa nave, dividida en catro tramos e cuberta con bóveda de canón, con cabeceira románica. O seu retablo maior, manierista, ten tres rúas e tres corpos e é obra de Lucas Formente.
O alcalde de Balboa, Juan José López, explicou que a causa do incendio puido ser "a chama dun cirio ou un curtocircuíto", aínda que apuntou que serán a Garda Civil e Patrimonio quen determinen a orixe dun lume "que podería destruír todo o templo". Congratulouse de que un veciño dese a voz de alarma ao ver o fume, "o que permitiu unha rápida actuación e limitar os danos". Dixo que será "moi difícil" restaurar o retablo e lamentou que o lume danase unha peza crave para declarar BIC o templo.
