Pedrafita do Cebreiro acolleu este mércores un acto de homenaxe a Elías Valiña, coñecido como o cura do Cebreiro, de cuxo falecemento se cumpren 30 anos. No acto, o conselleiro de Cultura e Turismo, Román Rodríguez, destacou "o enorme labor do pai das frechas amarelas" na promoción do Camiño de Santiago e cualificouno como un dos "principais protagonistas" da revitalización da ruta xacobea. "Resultou un actor principal na recuperación dunhas rutas e dunha tradición xacobea coa que gañar o futuro", dixo o conselleiro.
Ademais de Rodríguez participaron no acto —no santuario de Santa María a Real— a comisaria do Xacobeo 2021, Cecilia Pereira; o alcalde de Pedrafita, José Luis Raposo, e o xornalista e biógrafo de Valiña, Luís Celeiro, xunto a unha sobriña do homenaxeado, Pilar Armesto Valiña, e o presidente da Federación Galega de Asociacións de Amigos do Camiño de Santiago, Manuel López.
Ante todos eles, o conselleiro referiuse ao cura do Cebreiro como "un exemplo dos bos e xenerosos" que cos seus actos "fortalecen e consolidan os valores" da sociedade.
Os asistentes realizaron unha ofrenda ante a tumba de Elías Valiña, onde depositaron un centro de flores amarelas con forma de sinal como as que indican as rutas do Camiño de Santiago. As que el creou.
No evento déronse a coñecer os distinguidos cos Premios Elías Valiña 2019: Les Amis Du Chemin De Saint Jacques Pyrennes Atlantiques e a Asociación Xacobea de Almería Camiño Mozárabe. Ademais, Antolín de Cela Pérez recibiu unha mención especial "pola súa contribución ao fomento dos valores do Camiño".
