O Grupo de Urxencias Supramunicipal (GES) con sede en Becerreá efectuou 219 operativos ao longo do ano pasado. As intervencións relacionadas con danos ocasionados polos temporais foron as máis numerosas, xunto ás tarefas de limpeza e desinfección de espazos públicos por mor da pandemia. A área de actuación deste equipo de urxencias abarca os concellos de Baralla, Becerreá, Castroverde, Cervantes, Navia de Suarna, As Nogais, Pedrafita do Cebreiro e Triacastela.
Ao longo do ano pasado, o GES becerrense saíu 27 veces por problemas derivados pola neve e xeo en estradas –un total de 18– e nove veces para axudar a vehículos atrapados pola neve. A elas hai que sumar outras 16 actuacións por árbores caídas en estradas, o que fai un total de 43 saídas. A maiores, o GES contribuíu ao control de trece verteduras e desprendementos en estradas, algúns deles motivados tamén polo mal tempo. As intervencións de limpeza e desinfección de espazos públicos foron 42.
Os labores de socorro en accidentes de circulación son outras das actividades máis habituais dos integrantes do equipo de urxencias becerrense, que atenderon catorce sinistros con feridos e doce sen feridos. No balance anual figuran unha excarceración, cinco saídas de apoio ao 061 e o helicóptero de e
O control de animais soltos en estradas, un problema reiterado en municipios rurais de montaña, provocou catorce chamadas ao GES, ás que se sumaron outras dez para retirar animais mortos ou feridos.
Este grupo de urxencias prestou a súa axuda en trece incendios, nove de carácter urbano e catro en vehículos e maquinaria, e atendeu 29 casos de rescate e axudas diversas a persoas. Os seus integrantes participaron en quince ocasións no control do tráfico con motivo da celebración de festas e mercados.
A retirada de niños de vespas velutinas obrigaron a actuar ao GES en catro ocasións.
