Os fondos que se exporán no futuro museo dedicado ao humorista gráfico Antonio Fraguas Forges xa na Fonsagrada. A media tarde do xoves chegaba á localidade un furgón cargado con parte do legado do xenial artista.
José Manuel Saavedra Arango, curmán do humorista, acompañado por representantes do equipo de goberno local e traballadores municipais, foron os encargados de realizar os labores de descarga de todo o material que, de forma provisional, almacenarase nunha das salas do edificio do concello.
Esta parte do legado foi preparado pola viúva do artista, que, aínda que era madrileño de nacemento, considerábase fonsagradino de corazón
Esta parte do legado, que chegou este xoves á Fonsagrada, foi preparado pola viúva do artista, que, aínda que era madrileño de nacemento, considerábase fonsagradino de corazón. Desta localidade era oriúndo o seu pai e Forges sempre mantivo unha estreita relación con ela, ata o punto de ser considerado como embaixador da montaña lucense.
Desde o Concello mostrábanse moi agradecidos polo envío destes fondos. Tamén estaba moi satisfeito Saavedra Arango, un dos maiores impulsores do futuro museo, quen afirmaba que o próximo paso agora era "catalogar todo o material e almacenalo adecuadamente ata que poida ser exposto ao público no futuro museo".
"Estamos á expectativa de saber con que fondos contamos definitivamente, porque sabemos que parte do legado de Forges se repartirá entre o museo da Fonsagrada e outro centro similar que se proxecta en Alcalá de Henares, localidade á que tamén estaba "moi vinculado", explicaba o xoves José Manuel Saavedra.
O museo dedicado a Forges é un proxecto no que traballa desde hai un tempo o goberno local. O obxectivo é habilitar para este fin o edificio do antigo consistorio, para o que precisa un investimento de 270.000 euros.
Para conseguir este financiamento xa se enviou o proxecto ao GDR Montes e Vales Orientais para que o avalíe. O alcalde, o socialista Argelio Fernández, tamén iniciou conversacións con outras institucións "para completar o financiamento".
