As Nogais converteuse este domingo nun grande escaparate dos alimentos da Montaña con motivo da súa décimo cuarta Festa da Empanada, que puxo en valor, un ano máis, a produción autóctona.
Esta cita, organizada polo colectivo local de empresarios Adean, co apoio do Concello, contou co sol como grande aliado e mostrou o seu tirón, xa que centos de persoas achegáronse ata As Nogais para gozar desta feira, que abriu as súas portas ás dez da mañá e prolongouse ata última hora da tarde.
Non só houbo éxito de público, senón tamén de participación dos produtores. Así, segundo destacou o alcalde, Jesús Núñez, ante a gran cantidade de expositores que se interesaron por este evento, non foi suficiente o espazo que ocupan habitualmente -a praza principal e a rúa Rosalía de Castro-, polo que houbo que situar algúns tamén na rúa Curros Enríquez.
Os postos máis concorridos foron os da decena de panaderías da comarca, con empanadas, preparadas en distintas receitas, e outros produtos. Tamén houbo animación nas casetas que ofrecían artigos cárnicos e outros emblemas gastronómicos da zona, como o queixo do Cebreiro.
A ampla oferta desta feira completouse con postos de artesanía, roupa e bixutería, entre outros artigos.
PREMIADOS. No transcurso da xornada grande deste festexo entregáronse os premios dos certames celebrados o día anterior, que repartiron en premios case 400 euros.
No concurso de empanadas, o primeiro posto foi para Amadora Novo López. Presentou unha a base de butelo e nabizas que tamén levou o galardón á innovación. O segundo posto foi para Concepción Vázquez, cunha de carne e brécol, e o terceiro para Enrique Rodríguez, cunha de mazá. Silvia Santín, cunha empanada "de aldea", levou o premio á mellor presentación.
No concurso infantil de repostería, foi primeira Lucía Carballo Rosón, quedou segunda Zaira Alba Novo e terceiro, Iago Álvarez. Houbo premios para todos os menores.
Varias actuacións amenizaron a xornada, entre elas a do grupo de baile Pena Ubiña, de Babia (León), e a asociación local Abrente. Menores deste último colectivo tamén recordaron cunha representación a festividade dos maios.