A XXXIII Feira do Queixo do Cebreiro, recentemente declarada Festa de Interese Turístico de Galicia, reunirá este venres en Pedrafita máis dun centenar de expositores, que porán á venda máis de 3.000 pezas deste produto, xunto a outros elaborados de forma tradicional.
O evento foi presentado este martes na sede da Xunta en Lugo, nun acto no que estivo presente o delegado territorial do Goberno autonómico en Lugo, José Manuel Balseiro; o alcalde de Pedrafita, José Luis Raposo; o presidente do Consello Regulador da Denominación de Orixe Protexida, Enrique Fernández; a xefa territorial da Consellería de Cultura e Turismo, María José Gómez, e a deputada responsable da área de cultura da Deputación Provincial, Pilar García Porto.
Tanto Xunta como Deputación colaboran no financiamento deste evento que, logo de 33 edicións, está completamente asentado no calendario, segundo aseguraron todos os presentes no acto de presentación.
A feira comezará este venres ás 9.30 horas e nela daranse cita as cinco queixerías adscritas a esta denominación de orixe (Castelo de Brañas, Santo André, Marqués de Cernadas, Fonchave e Gran Despensa Abadía de Samos).
A partir das 11.00 horas haberá pasacalles, a cargo da charanga DGT e, ás 12.00 actuará a Asociación Cultural Xistra. Manuel Lolo Aira, conselleiro executivo de AMSlab e natural de Pedrafita, será o encargado de ler o pregón, acto que está programado para as 13.00 horas.
A Feira do Queixo do Cebreiro está plenamente consolidada como un dos eventos gastronómicos máis significativos dos celebrados na provincia. Esta DOP comercializou o pasado ano preto de 90.000 pezas de queixo.
