A casa da cultura de Becerreá albergou en días pasados un curso sobre ecoturismo nas Reservas da Biosfera, no que varios expertos destacaron como unha oportunidade laboral potenciar o turismo activo nos Ancares.
No curso puxéronse de manifesto as oportunidades de emprego local asociadas ao aproveitamento sostible de recursos naturais. Os relatores viron nesa alternativa unha opción para a creación de novos empregos ou para completar actividades económicas de explotacións ou empresas deste territorio.
Este curso enmárcase dentro dun plan de formación que leva a cabo o Grupo de Desenvolvemento Rural (GDR) Montes e Vales Orientais.
Os asistentes coñeceron a importancia de potenciar os elementos da Reserva da Biosfera dos Ancares -flora, fauna, etnobotánica, artesanía, tradicións ou construcións típicas- para que se convertan en activos turísticos que melloren a economía e as oportunidades de traballo na comarca.
Este recentemente clausurado curso enmárcase nun plan de formación que leva a cabo o GDR Montes e Vales Orientais
Outra das liñas formativas incidiu na compresión por parte dos habitantes en destacar esta distinción de Reserva da Biosfera como unha marca de calidade recoñecida a nivel mundial, que certifica que nos Ancares consérvanse uns costumes sostibles e que dotan a comarca dunhas características singulares que gozan dun alto grao de recoñecemento internacional.
De feito, Os Ancares foi declarada Reserva da Biosfera pola Unesco no ano 2006, o que acredita á comarca cun selo baixo o que se deben amparar todo tipo de produtos e de servizos do territorio para destacar a súa calidade.
Ademais, durante o acto de clausura, José Fernández, alcalde de Navia de Suarna e presidente do GDR Montes e Vales Orientais, anunciou a firma dun acordo coa cooperativa A Carqueixa e co Ingacal.
O GDR achegará 10.000 euros, provenientes do programa Leader, para estudar e caracterizar as variedades de castaña máis interesantes e mellor adaptadas na comarca, co fin de promover o seu uso en novas plantacións, e crear así negocios economicamente máis rendibles.
CARTA DE ADHESIÓN. Por outra banda, José Fernández asinou unha carta de adhesión ao proxecto de cooperación Bioeconomía, promovido polo GDR portugués Terra Fría, co obxectivo de resaltar o valor de produtos autóctonos como a castaña ou o mel.
