Os traballos de recuperación da vivenda calcinada nos incendios forestais de outubro do ano pasado no Pando, Cervantes, comezaron recentemente. O propietario da casa, Antonio González, conta para as obras co financiamento da Xunta, que achega preto de 102.000 euros.
O delegado territorial do Goberno galego en Lugo, José Manuel Balseiro, visitou este luns os traballos no Pando xunto ao alcalde de Cervantes, Benigno Gómez, e varios técnicos municipais e autonómicos. As obras iniciáronse nas últimas semanas e prevese que finalicen en novembro do próximo ano.
A axuda, outorgada por parte da Consellería de Infraestruturas e Vivenda, forma parte do paquete de medidas urxentes aprobadas pola Xunta no pasado mes de outubro. Dos máis de 100.000 euros investidos en total, un 25% do importe foi xa adiantado ao propietario. O resto dos pagos efectuaranse en dúas anualidades, de 2018 e 2019, logo da xustificación de gastos dos traballos de reconstrución.
A contía subvencionada correspóndese co límite máximo permitido no plan de axudas autonómicas, ao tratarse a vivenda de residencia permanente e habitual do seu propietario. A axuda tamén inclúe os gastos correspondentes á reposición das instalacións complementarias e anexas ao inmoble.
Antonio González, que polo momento reside nunha vivenda alugada próxima á casa calcinada, móstrase "contento" co inicio das obras, aínda que lamenta o "lixeiro atraso" do comezo das mesmas. Este inmoble do Pando foi o único da provincia de Lugo que resultou queimado na onda de incendios do ano pasado.
MÁIS AXUDAS. Balseiro tamén anunciou que a Xunta está a terminar de tramitar os convenios con outros sete concellos lucenses para sufragar danos pola vaga de incendios en infraestruturas locais. Os concellos beneficiados serán Castro de Rei, Cervantes, Negueira de Muñiz, As Nogais, Pantón, Samos e Triacastela. A Xunta está pendente da firma formal con cada municipio implicado.
O goberno autonómico subvencionará ata o 50% dos danos declarados, á espera de que a Deputación Provincial ou o Goberno central se fagan cargo do resto da contía.
