A marcha do edil socialista Carlos Fernández Vázquez á lista do Partido Popular reaviva a loita pola alcaldía no Concello da Fonsagrada. Fernández, que nas eleccións de 2015 ocupou o posto número seis do PSOE e que na actualidade era o responsable municipal da área de medio rural e desenvolvemento local, formaliza este mércores a súa renuncia ao cargo nun pleno extraordinario.
Pero máis aló das consecuencias que esta renuncia poida ter para o actual goberno de Argelio Fernández -que neste mandato conta cunha folgada maioría ao sumar oito concelleiros, por dous do PP e un do BNG-, están as que este cambio poida ter de cara ás próximas municipais.
Carlos Fernández, tras oito anos no goberno local socialista, decidiría cambiar de lista ao sentirse máis identificado co proxecto que o candidato popular á alcaldía, José Luis Regueiro, ten para o municipio.
A integración na candidatura dos populares faina, segundo fontes próximas ao edil, co ánimo de traballar e sumar para A Fonsagrada. Repetir como concelleiro non lle resultará con todo fácil, xa que ocupará o número sete da lista, un posto bastante alto se se ten en conta que nos pasados comicios o PP só conseguiu dúas actas.
Pola súa banda, o alcalde da Fonsagrada, Argelio Fernández, non quixo realizar ningunha valoración respecto diso e limitouse a confirmar a renuncia do ata agora concelleiro do seu equipo.
