As máquinas traballan desde hai uns días no acondicionamento de varios tramos das estradas LU-P-0702 e LU-P-1401, no municipio de Cervantes. Esta actuación, promovida pola Deputación Provincial, supón un investimento total duns 550.000 euros.
O vicepresidente da Deputación, Argelio Fernández Queipo, e o alcalde de Cervantes, Benigno Gómez Tadín, desprazáronse recentemente ata o lugar onde se están levando a cabo os traballos para supervisar o avance dos mesmos.
Os labores, en ambos os casos, consisten na renovación do firme da calzada, a través dunha nova capa de rodaxe con aglomerado en quente, limpeza das cunetas e incremento da sinalización vertical e horizontal. Desde a Deputación aseguran que, desta forma, contribuirase a mellorar a seguridade destas vías, o que beneficiará directamente a uns 160 veciños da zona.
Na estrada LU-P-0702, que vai de Becerreá a Navia de Suarna por San Román a Degrada, actuarase entre os puntos quilómetros do 0 ao 3 e do 17 ao 23. Trátase dunha vía de comunicación fundamental na zona, xa que ademais da capital municipal, atravesa outros núcleos rurais de importancia, como As Seixas, Eilarrío, Bolois, Catroventos ou Trigais para chegar finalmente a Degrada. Nesta vía están a executarse tamén labores de ensanche da calzada naqueles tramos nos que así o permite o trazado.
Os traballos que se están levando a cabo na LU-P-1401 comprenden un tramo duns 700 metros, concretamente, entre os puntos quilométricos 10,6 ao 11,3. Esta vía tamén é moi utilizada, sobre todo, polos veciños da zona, xa que une a LU-723 por Degrada, pasando por Piornedo ata o límite provincial.
OUTRAS ACTUACIÓNS. O vicepresidente da Deputación e responsable da área de obras, Argelio Fernández, tamén indicou que nas próximas semanas "comezarán novos traballos de mellora do firme na LU-P-1401, concretamente, nos seus primeiros cinco quilómetros".
Esta obra complementarase con outras melloras na LU-P-1402, o que suporá outros 370.000 euros de investimento.
