A Garda Civil detivo este luns tres veciños de Carballo por un roubo cometido de madrugada no bar Centro de Baralla. Atendendo á información do instituto armado, os asaltantes iniciaron alí unha escapada que acabou co seu vehículo chocando co dunha patrulla que os seguía a uns cantos quilómetros do municipio lucense, no coruñés da Laracha. Tras intentar fuxir a pé, foron arrestados pouco despois.
Foi a culminación a un despregamento no que a comandancia de Lugo alertou á da Coruña do seguimento ao vehículo, que se dirixía en dirección á Coruña, por estar supostamente relacionado co roubo nun bar de Baralla. A partir de aí, unha patrulla da Laracha localizou o coche e comezou a seguilo, e mobilizáronse outras próximas para ofrecerlle apoio.
Segundo a información facilitada pola Garda Civil, os despois detidos realizaron varios intentos de escapar durante o seguimento. O último foi na Laracha, onde se desviaron por varias rúas, ata que nunha delas atoparon o vehículo dos axentes, que trataban de frealos dirixíndose a ese punto ao ser unha vía estreita. Os perseguidos intentaron continuar a súa fuxida a pesar da falta de espazo e chocaron co vehículo da Garda Civil, ademais de con tres turismos aparcados no lateral.
Foi nese momento cando abandonaron o vehículo e iniciaron a súa fuxida a pé, polo que os axentes comezaron a perseguilos. Un dos supostos responsables do roubo foi detido "nas proximidades" e os outros algo despois, preto dun local hostaleiro da localidade.
Segundo o instituto armado, no vehículo no que viaxaban localizouse a mercancía roubada no local de Baralla, ademais dos pasamontañas utilizados. Os detidos foron trasladados ás dependencias da Garda Civil de Carballo.
