A Garda Civil detivo en Becerreá a un home que levaba no vehículo no que viaxaba 305 gramos de cocaína e útiles para a súa distribución en doses.
O detido é un veciño de Madrid de 42 anos e orixinario da República Dominicana. A detención tivo lugar o pasado luns, cando o home intentou eludir un control da Garda Civil nas inmediacións da rotonda do Cereixal.
Ao darse conta de que o condutor dun vehículo viraba bruscamente e marchaba a gran velocidade en dirección á estrada LU-680, os axentes iniciaron unha persecución e interceptárono a un quilómetro do lugar.
Comprobaron nese momento que o home viaxaba só e que levaba no vehículo dúas bolsas cun total de 305 gramos de cocaína. Portaba, ademais, útiles para a súa distribución en doses e dous teléfonos móbiles, que supostamente utilizaba para realizar as transaccións.
Tras atopar este material no vehículo, a Garda Civil detivo ao home e púxoo a disposición xudicial. Fontes do instituto armado consideran que con esta intervención desactivouse "un posible punto de distribución de drogas na comarca dos Ancares".