O colectivo Patrimonio dos Ancares presentou unha denuncia ante Patrimonio da Xunta de Galicia pola destrución de tres mámoas entre os concellos de Navia de Suarna e A Fonsagrada. Todas estaban catalogadas e rexistradas no Inventario de Bens Culturais de Galicia.
Membros da entidade aseguran que, en dúas delas, os danos foron producidos por maquinaria pesada "para o acondicionamento do terreo e a posterior plantación de eucaliptos", segundo confirma o presidente, Xabier Moure. Ambos os monumentos megalíticos formaban parte da necrópole de Campa das Penas, con máis de 5.000 anos de antigüidade, que estaba formada por máis dunha decena de mámoas. Esta formación está situada o lado da estrada provincial DP-0708 que transcorre de Alto do Restelo a Louxas.
Próxima a este viario atópase a necrópole de Peredelo, conformada por tres enterramentos, un dos cales tamén foi destruído e convertido en vertedoiro para o depósito de plásticos agrícolas, latas de aceite ou rodas, entre outros desperdicios.
"GRAVÍSIMOS" ATENTADOS. "Trátase de gravísimos atentados contra bens patrimoniais protexidos", lamenta Moure, quen precisa que puxeron estes feitos en coñecemento das administracións competentes para que "se investiguen e procedan a incoar os expedientes sancionadores aos responsables aos que non deben de ter problema en identificar, pois as mámoas estaban perfectamente catalogadas e co seu número de expediente", engade.
Desde Patrimonio dos Ancares reclaman ademais información a Patrimonio para determinar se para efectuar os traballos con maquinaria pesada solicitouse permiso previo, obrigatorio cando se vai a actuar nunha área de protección dun ben protexido "pero que nunca poden afectar ao ben en se", indica Moure.
SANCIÓNS. Desde o colectivo sinalan que os autores destas agresións enfróntanse a infraccións "graves" que poden levar multas que oscilan entre os 6.000 e 150.000 euros. De feito, en setembro de 2017 Patrimonio dos Ancares denunciou a agresión en Friol a dúas mámoas e a destrución doutra, todas catalogadas e incluídas no PXOM do municipio. Eses feitos supuxeron a imposición de sancións aos seus autores, segundo confirman desde a entidade. "Por desgraza, con independencia das sancións, estes importantes bens son irrecuperables", lamenta Moure.
