Un veciño da Fonsagrada, de 52 anos de idade, morreu este domingo pola tarde tras sufrir un accidente de tráfico e saírse da vía o coche que conducía. Trátase de Francisco Rodríguez Fiallega, unha persoa moi querida nun municipio que este domingo estaba en conmoción polo tráxico suceso.
Segundo informou a central galega de urxencias do 112 Galicia, o que era condutor e único ocupante do vehículo saíuse da vía cando circulaba ao seu paso polo lugar de Cabreira, na parroquia fonsagradina de Monteseiro, no límite con Asturias.
Dez minutos antes das sete da tarde, unha persoa chamaba á central para informar da existencia dun coche envorcado na estrada que une A Fonsagrada e Grandas de Salime. Tamén alertaba de que era posible que a persoa estivese atrapada no interior do vehículo.
De inmediato, desde o 112 Galicia puxéronse os feitos en coñecemento do persoal do Servizo de Urxencias Sanitarias de Galicia-061, dos Bombeiros de Sarria e do subsector de Tráfico da Garda Civil en Lugo. Tamén foron avisados os efectivos de Protección Civil da localidade, que acudiron ao lugar do accidente.
Con todo, nada se puido facer para salvar a vida deste veciño. Ao chegar, os axentes confirmaron o seu falecemento. Indicaron, ademais, que non era necesario o material de excarceración xa que o seu corpo estaba accesible.
Francisco Rodríguez Fiallega, que era dunha familia moi querida na zona, dedicábase á extracción de lousa na empresa Europizarra e os seus irmáns tamén estiveron vinculados á hostalería. Deixa tamén á súa nai, á súa parella, e a numerosos amigos e veciños que lamentan a súa perda.
