O Concello de Navia de Suarna está a levar a cabo obras de renovación da contorna da igrexa e do consistorio da Proba, a capitalidade da localidade. As actuacións, que contan cun investimento próximo aos 90.000 euros procedente do plan único da Deputación de Lugo e fondos propios municipais, comezaron a executarse hai uns días.
Os traballos concéntranse no centro da vila e consisten en cambiar o pavimento actual, a base de aglomerado, por un firme de pedra coa finalidade de facelo máis atractivo para os viandantes. Ademais, procederase a substituír por completo todas as tubaxes subterráneas (pluviais, auga e electricidade).
Outra das actuacións previstas é dotar de novas beirarrúas á zona. Os traballos teñen un prazo previsto de execución dun mes e medio, polo que se espera que finalicen a principios do mes de decembro.
CONTINUACIÓN. O rexedor de Navia de Suarna, o socialista José Fernández Fernández, destacou a importancia destes traballos "que pretenden mellorar o día a día dos nosos veciños e facer máis vistosa a nosa capitalidade". O alcalde precisou ademais que estas obras se enmarcan nun proxecto máis ambicioso de renovación da contorna da capitalidade municipal que terá continuidade nos próximos meses.
"Unha vez rematada esta fase de mellora que se centrou no centro da localidade, temos previso continuar co adecentamento das rúas que levan ata a Avenida dos Ancares", indicou o dirixente local, quen precisou que estas actuacións contarán cun investimento de 70.000 euros con cargo a fondos do plan único provincial. Consistirán en cambiar o pavimento, a tubaxe subterránea e as beirarrúas.
Fernández engadiu que unha vez finalizados estes traballos procederase a substituír todas as luminarias existentes por outras de baixo consumo con tecnoloxía led. "Estamos moi satisfeitos con este proxecto que pretende darlle unha nova imaxe á Proba para o uso e goce de veciños e visitantes", concluíu o rexedor.
