O Concello da Fonsagrada renovou a sinalización identificativa de toda a vila. En concreto, o goberno local procedeu a instalar medio centenar de novos paneis. A actuación contou cun orzamento de 15.000 euros procedentes de fondos propios.
O proxecto consistiu na substitución dos paneis antigos, dado o seu estado de deterioración, por uns novos e renovados. En concreto, sinalizouse o patrimonio relixioso e civil de interese no municipio, así como outras instalacións e espazos que desde a administración municipal consideran fundamentais.
Identificáronse todos os lugares de interese na localidade, tales como a casa da cultura, a praia fluvial, os xulgados, o centro de saúde, a zona escolar ou o campo de fútbol, entre outros.
Tamén se procedeu a colocar novos sinais coa información necesaria para chegar aos establecementos e instalacións que abriron as súas portas nos últimos anos na Fonsagrada.
Doutra banda, instaláronse, ademais, letreiros especialmente dedicados aos peregrinos, coa finalidade de guialos desde a entrada da vila aos diferentes albergues e establecementos hostaleiros.
Desde o Concello fonsagradino resaltan a importancia desta actuación, cuxa finalidade era actualizar os paneis informativos da vila e facilitar que as persoas que se acheguen ao municipio poidan chegar de forma rápida ao seu destino.
