O Concello da Fonsagrada sacará a licitación ao longo deste mes, nun importe de 101.333 euros, as obras de reforma da alameda da vila, grazas a un convenio subscrito coa Deputación de Lugo o pasado mes de xuño, segundo o cal o organismo provincial sufragará todo o importe da intervención salvo o Ive, 17.586 euros, que o asumirá o propio Concello.
O proxecto contempla a renovación íntegra da zona infantil de xogos, a creación dun parque biosaludable para que os maiores poidan realizar exercicio e a reforma total da pista de baloncesto e a creación doutra de fútbol con céspede artificial.
O alcalde do municipio, o socialista Carlos López, indica que este proxecto era unha vella demanda dos veciños, que consideraban que o espazo da alameda estaba infrautilizado. Deste xeito, a intervención contempla, ademais de renovar os pavimentos, dotar a zona dun mobiliario actualizado e acorde coas necesidades dos veciños.
Neste sentido, o rexedor fixo fincapé na creación do parque biosaludable, dotado de equipamento deportivo para realizar exercicio físico. López destacou a localización deste parque, nas proximidades do Residencial Rois, "o que será un apoio para os seus usuarios".
Doutra banda, tamén resaltou a promoción do ámbito deportivo, coa creación das novas pistas que permitirán aos usuarios practicar deportes como baloncesto, fútbol e fútbol sala, entre outros. O peche perimetral destas pistas deportivas tamén sufrirá cambios, e o valo metálico substituirase por outro tipo de peche de madeira, máis acorde coa contorna.
PRAZOS. O rexedor fonsagradino asegurou que o proxecto sairá a licitación nos próximos días, e que espera que as obras estean finalizadas antes do verán, para que os veciños poidan gozar das instalacións na época estival.
"Tratar dunha obra moi importante para A Fonsagrada, pois implica dotar ou municipio de novos espazos", engadiu.
