O Concello
O contrato tamén contempla a posibilidade dunha prórroga de tres anos, polo que o seu valor total estimado ascendería aos 5.144.895 euros, divididos en cantidades iguais de 1.071.700 euros por ano. Este importe supón un incremento de preto de 200.000 euros con respecto ao contrato actual, segundo indicou o alcalde do municipio, Carlos López. Este incremento responde o aumento de persoas usuarias deste servizo, que se sitúan agora ao redor das 200, segundo matizou o rexedor, que tamén sinalou que hai varias en lista de espera pendentes da valoración da discapacidade por parte da Xunta de Galicia.
As bases establecen un prezo de hora do servizo co Iva incluído –dun catro por cento– fixado en 15,96 euros para as horas de dependencia, e de 16,06 para as de libre concorrencia, Co Iva do dez por cento incluído nese importe. Este prezo non poderá ser superado polos aspirantes, soamente mellorado á baixa.
O número de horas para dar atención á dependencia no municipio está cifrado en 64.980 ao ano, cun total de 5.049 ao mes. De libre concorrencia, o Concello establece un número de 2.160 horas anuais, repartidas en 180 para cada mensualidade.
O anuncio de licitación pode atoparse no perfil do contratante, na plataforma de Contratos de Galicia, así como no diario oficial da Unión Europea.
O alcalde de A Fonsagrada, Carlos López, indicou que era o deber do Concello sacar a concurso a prestación deste servizo, despois de que hai tres anos as catro empresas que se presentaron para ofrecelo renunciasen finalmente a formalizar o contrato, polo que o seguiu prestando Fonsasis Sociedade Cooperativa, unha entidade da Fonsagrada.
Carlos López comentou que o motivo da renuncia naquel momento foi económico, xa que a retribución que o Concello marcaba por hora non contemplaba os desprazamentos habituais das traballadoras, cuestión que melloraron a partir de entón con Fonsasis e que agora tamén aparece reflectida nas tarifas do presente concurso.
