O Concello da Fonsagrada realiza obras de mellora en dúas das principais avenidas da localidade: a de Galicia e a de Asturias. Para estas actuacións inviste case 350.000 euros procedentes do plan único da Deputación de Lugo.
Os traballos consisten nunha renovación integral das dúas vías centrais do municipio e pretenden emendar a deterioración que presentan a causa do paso do tempo. No caso da Avenida de Asturias as actuacións xa finalizaron e os operarios están estes días traballando na Avenida de Galicia. Desde o Concello indican que está previsto que as obras finalicen a finais deste mes de outubro.
En concreto, as obras consisten en levantar as beirarrúas coa finalidade de amplialas e colocarase un novo bordo de granito. Ademais procederase a renovar todas as canalizacións, desde a de augas pluviais á de telefonía.
O rexedor local, o socialista Carlos López, destacou que se trata das dúas principais avenidas da localidade que contan con grande afluencia de tráfico e resaltou a importancia destas obras "que pretenden mellorar a imaxe do centro urbano e facer os viais máis confortables e seguros para todos os usuarios".
As obras contaron cun orzamento de máis de 30.000 euros, procedentes dunha subvención concedida por Turismo de Galicia. Os traballos, que estarán listos a finais de mes, consisten en renovar os adoquíns do exterior das instalacións. Colocarase ademais un peche de madeira na parte traseira do edificio e reconstruirase un muro de pedra.
