O Concello de Becerreá renovará unha gran parte das rúas do seu núcleo urbano a partir da semana que vén. O orzamento destinado para esta rexeneración viaria ascende a 110.000 euros e está financiado polo plan único da Deputación de Lugo cunha achega económica do propio Concello.
As actuacións, aprobadas na última xunta de goberno, dotarán as vías dunha nova capa de aglomerado en quente de catro centímetros e tamén servirán para sinalizalas en horizontal e vertical. A empresa encargada de levar a cabo as obras será Asfagal, segundo indica o rexedor, Manuel Martínez.
A Praza do Mercado, un dos lugares máis frecuentados da vila debido á súa proximidade coas instalacións do mercado gandeiro, será un dos espazos que se verán afectados por esta intervención. Tamén a rúa Ancares, unha das arterias da localidade.
Ademais destas dúas grandes actuacións, o proxecto tamén beneficiará ás rúas Anovello, Cruz Vermella, Pedrafita do Cebreiro, Helena Villar Janeiro, Gómez Jiménez, Penas, Pacios, Avenida de Madrid, Ronda de Outeiro, Rego do Ribón, Carril do Ferreiro e Travesía do Mercado.
PRÓXIMAS ACTUACIÓNS. Pendentes de tramitación administrativa atópanse outras actuacións de mellora viaria no concello. Trátase da reparación do firme e tintado dos accesos a Castel de María, en Quintá de Cancelada, por importe de 225.000 euros; Fraián de Abaixo e Fraián de Arriba, con 73.000 euros; Acebo e Os Prados, con 80.000 euros, e o remate do asfaltado no paseo peonil da Avenida de Madrid, na capital do municipio.
Tamén se atopa pendente de licitación a substitución das lámpadas de iluminación pública nalgunhas das rúas da localidade e doutros núcleos do concello que aínda non se cambiaron á tecnoloxía led.
O orzamento desta actuación de eficiencia enerxética, segundo indican fontes municipais, ascendería a 18.000 euros, pero tamén contribuiría ao aforro posterior para o Concello coa consecuente redución de consumo eléctrico.
