O alcalde da Fonsagrada, Argelio Fernández Queipo, que tamén é vicepresidente e responsable de Vías e Obras na Deputación de Lugo, confirmou que nas últimas horas estivo chovendo, circunstancia que está a axudar a que a neve que había acumulada sobre as estradas "se vaia retirando aos poucos".
Por iso confía en que, ao longo deste martes, as estradas queden limpas de neve, pero despois "chegará o traballo inxente" de retirar de todas as vías "as ramas" e as árbores que caeron nos últimos días a causa do peso acumulado nas súas copas.
Segundo Fernández Queipo, "cada vinte metros" pode verse unha árbore caída, debido ao copiosa que foi a nevada e ao feito de que as árbores de folla caduca aínda non perderan a súa folla, de forma que a neve multiplicou o peso das copas e provocou a rotura de ramas, nuns casos, ou a caída dos propios castiñeiros, carballos ou bidueiros noutros.
Por outra banda, o rexedor local confirmou que tamén espera que este martes quede restablecida a subministración eléctrica en todos os núcleos de poboación, dado que a empresa subministradora Begasa informou este luns ao Concello da Fonsagrada de que aínda quedaban entre 300 e 400 usuarios sen luz.
Si recuperaron a subministración eléctrica os veciños da capital municipal de Pedrafita do Cebreiro, segundo o seu alcalde, José Luis Raposo Magdalena, entre as 19.30 e as 20.00 horas deste luns, unha vez que a empresa subministradora logrou reparar a liña que cortara a caída duns piñeiros sobre o tendido.
Raposo Magdalena tamén confirmou que aos poucos as vías do seu municipio van recobrando a normalidade e que a situación mellorou grazas á choiva, aínda que a pasada noite aínda nevou en puntos altos.
O Subsector de Tráfico da Garda Civil de Lugo informou a Efe de que á primeira hora desta mañá podíase circular con normalidade por toda a rede principal da provincia de Lugo.
