Un camión articulado que circulaba ás 7.25 horas deste mércores á altura do quilómetro 46,900 da autovía A-6 en dirección A Coruña, no municipio das Nogais, sufriu unha saída de vía e acabou chocando contra a mediana. A causa do impacto, o vehículo sufriu o rebentón da súa roda dianteira esquerda, aínda que o condutor logrou facerse co control para acabar deténdose na beiravía, sen que nin el nin ningún outro usuario da vía sufrisen ningún tipo de dano.
Ao lugar dos feitos desprazouse unha patrulla do subsector de Tráfico da Garda Civil, que se encargou de sinalizar a zona ata que o camión puido ser retirado, e un equipo de mantemento de estradas, para limpar a vía.
