Varias patrullas da Garda Civil localizaron en bo estado a peregrina que se perdeu este mércores en Pedrafita do Cebreiro mentres facía o Camiño de Santiago, segundo informan a Efe fontes do operativo de procura.
A muller, de nacionalidade italiana, presentaba síntomas de esgotamento e foi trasladada ao centro de saúde da localidade lucense para realizarlle un recoñecemento.
Foi ela mesma quen alertou ao centro de emerxencias, sobre a unha da tarde, de que se perdeu ao desorientarse mentres percorría o tramo comprendido entre Villafranca del Bierzo e O Cebreiro.
Explicou que descoñecía o lugar onde se atopaba, asegurou que non podía avanzar porque tiña as pernas moi doloridas pero que non necesitaba asistencia sanitaria.
O 112 avisou á Garda Civil que, ao mesmo tempo, comunicou que recibira a alerta dun grupo de peregrinos italianos que aseguraban perder a unha compañeira.
Ademais dos axentes da Garda Civil, membros do GES de Becerreá e efectivos de Protección Civil da Fonsagrada e de Sarria participaron no operativo de procura.